Takimi i radhës ndërmjet shefave të delegacioneve të Kosovës dhe Serbisë mund të mbahet gjatë javës së ardhshme.
“Mund të konfirmoj se ekziston ideja që javën e ardhshme të zhvillohet takimi në nivelin e kryenegociatorëve në Bruksel”, ka thënë Peter Stano, zëdhënës në BE për politikë të Jashtme dhe Siguri.
Siç transmeton Radio Evropa e Lirë, zëdhënësi nuk ka dhënë detaje se çfarë mund të flitet në këtë takim.
Kanë kaluar gati tre muaj prej kur nuk ka pasur takime në nivelin e lartë ndërmjet Kosovës dhe Serbisë. Ndërkaq, në nivel të shefave të delegacioneve për dialog takimi i fundit ishte zhvilluar më 29 tetor në Bruksel kur palët kishin diskutuar për pretendimet financiare dhe pronësore mes tyre.
