Ministrat për Ambient dhe Klimë të grupit të shtatë vendeve më të industrializuara (G7) janë zotuar për t’i dhënë fund ndotjes me plastikë në shtetet e tyre, deri më 2040.
Ata e kanë bërë të ditur këtë vendim, përmes një deklarate që kanë lëshuar pas takimit që kanë zhvilluar të dielën në veri të Japonisë.
“Ne jemi zotuar për t’i dhënë fund ndotjes plastike, me ambicien që të ulim në zero këtë lloj të ndotjes deri më 2040”, është thënë në deklaratë, transmeton REL.
Gjermania, Franca, Kanadaja, Britania dhe Bashkimi Evropian, veçse janë pjesë e një koalicioni shumëkombësh, që e ka bërë këtë zotim vitin e kaluar.
Mirëpo, kjo është hera e parë që vendet tjera që janë pjesë e grupit – Japonia, Shtetet e Bashkuara dhe Italia – janë bërë pjesë e zotimit për plastikë zero deri më 2040.
Ndotja me produkte plastike është dyfishuar në gjithë botën në 20 vjetët e fundit dhe vetëm 9 për qind e sasisë totale arrin të riciklohet me sukses.
Kombet e Bashkuara kanë thënë se volumi i plastikës që depërton në oqeane gati që do të trefishohet deri më 2040.